Welcome to HealthnOrganicsTamil !!!

தூயமல்லி அரிசி – நம் பாரம்பரிய அரிசி

நவீன உலகில் பல பல இயந்திரங்களுடன் வாழ்ந்து வரும் நாம் அந்த இயந்திரங்களுக்கு கொடுக்கும் முக்கியத்துவத்தைக் கூட நமது உடலுக்கு கொடுப்பதில்லை என்பது வேடிக்கையாகத்தான் இருக்கிறது.

தூயமல்லி அரிசியை சமைக்கும் முறை

இயந்திரம்

சாதாரண தெருவில் உள்ள  டீ கடையில் உட்காந்திருப்பவரும் சரி, அடுப்படியே கடவுள் என்று தவம் கிடப்பவரும் சரி அல்லது கோடிக்கணக்கில் செலவு செய்து கட்டிய பிரம்மாண்ட அறையில் உட்கார்ந்திருப்பவரும் சரி, ஒவ்வொரு இயந்திரத்தைப் பற்றியும் அக்குவேரு ஆணிவேராக பிரித்து வெட்டிக்கதைப் பேசிக்கொண்டிருப்பார்கள்.

இயந்திரம் என்றதும் ஏதோ இன்றைய புரியாத கண்டுபிடிப்புகளை பற்றிக் கூறுகிறேன் என்று நினைக்க வேண்டாம், ஒவ்வொருவரின் ஆறாவது விரலாக இருக்கும் செல் போனில் தொடங்கி வீட்டில் இருக்கும் மற்ற இயந்திரங்களையும் சேர்த்து தான் கூறுகிறேன். 

ஒரு உதாரணத்திற்கு வீட்டில் இருக்கும் மாவு அரவை இயந்திரத்தைப் பார்ப்போம். ஒவ்வொரு வீட்டில் தயாரிக்கும் இட்லியும் தோசையும் மிகப்பிரமாதமாக இருக்கிறது அதுவும் மல்லிகைப் பூவைப்போல் பஞ்சு பஞ்சாக இட்லி இருப்பதும் அதன் சுவை, மணம் என ஒவ்வொன்றையும் ரசித்து ரசித்து உண்பதுடன் அந்த மிருதுவும், சுவையும் ஏன் நமக்கு வருவதில்லை என்று கூட பலர் கவலைப் பட்டு புதுப்புது அளவுகளையும் முறைகளையும் ஒவ்வொரு நாளும் முயற்சி செய்து கொண்டே இருப்பார்கள். விடையோ சில நேரங்களில் சரியாக வரும் பல நேரங்களில் வராது என்பதுதான்.

என்றாவது இதற்கு என்ன காரணம்.. ஏன் அவர்கள் வீட்டில் செய்த இட்லி மிருதுவாகவும் சுவையாகவும் இருக்கிறது.. ஏன் நாம் செய்தது அந்த தன்மையில் இல்லை என்று பொறுமையாக யோசித்ததுண்டா?… ஆம் என்றால் நிச்சயம் பலன் கிடைத்திருக்கும். 

அதற்கு காரணம், முதலில் அரவை இயந்திரம் எந்த பழுதும் இல்லாமல் இருக்க வேண்டும், சரியான சுழற்சியை தகுந்த நேரத்தில் கொடுக்க வேண்டும். அதிலிருக்கும் மோட்டார் அதிக சூடினை ஏற்றாமல் மாவினை அரைத்து கொடுக்க வேண்டும், மற்ற பாகங்களான மாவினை தள்ளும் பாகம், அதன் ஆட்டுக்கல்லின் அசைவு போன்றவையும் சரியாக இருக்கவேண்டும். ஆகா மொத்தத்தில் முதலில் இயந்திரம் சரியானதாக பழுதின்றி இருக்க வேண்டும்.

இட்லி மிருதுவாக இருக்க

இதுமட்டும் போதுமா இட்லி மிருதுவாக வருவதற்கு. நிச்சயம் இல்லை, அடுத்தது இட்லிக்கு பயன்படுத்தும் அரிசி, அதற்கு ஏற்ற உளுந்து, தேவையான வெந்தையம்… அரிசி, வெந்தையம் மற்றும் உளுந்தினை ஊறவைக்கும் நேரம்,  ஆட்டும் நேரம் அதன் வேகம், பின் மாவினை கரைக்கும் பக்குவம், அதனை புளிக்க வைக்கும் நேரம், பின் அரவை இயந்திரத்தை தூய்மையாக கழுவி வைப்பதும் என்று ஒவ்வொன்றையும் பார்த்து பார்த்து கவனித்து செய்தால் மற்றவர்கள் வீட்டில் உண்ட இட்லியைவிட நமது வீட்டு இட்லி இன்னும் சுவையாகவும் மிருதுவாகவும் இருக்கும்.

ஒவ்வொரு நாளும் இவற்றை பார்த்து பார்த்து செய்ய நேரமும் இல்லை, பொறுமையும் இல்லை என்கிறீர்களா? முதலில் ஒரு நாள் செய்யுங்கள் அதன் சுவையையும் வீட்டில் கிடைக்கும் பாராட்டையும் பெறுங்கள், இதை விட வேறு என்ன வேண்டும் பின் இரண்டு மூன்று நாள் பொறுமையாக வேலை இல்லாத நாளில் பழகுங்கள் பின் அதுவே பழக்கமாகி விடும். இருக்கும் நேரத்திலேயே பின் சுலபமாக எளிதாக செய்து விடலாம்.

தமிழக வீடுகளில் அன்றாட காலை உணவான இட்லிக்கே இவ்வளவு வேலை என்றால், அழகையும், அறிவையும் சேர்த்து வைத்திருக்கும் நமது உடலுக்கு எவ்வளவு கவனிப்பு தேவை. 

அழகு

அழகு என்றதும் பெண்களை மட்டும் குறிப்பதாக நினைக்க வேண்டாம் ஆண்களையும் சேர்த்து தான் கூறுகிறேன். இயற்கையின் படைப்பின் மனிதர்களைத் தவிர மற்ற எல்லா உயிரினத்திலும் ஆண் இனமே அழகானதாக இருக்கிறது. 

உலகையே கைக்குள் திமிராக வைத்திருக்கும் மனிதஇனம் ஒன்றிற்கு அடிமைப் பட்டிருக்கிறது என்றால் அது அழகிற்கு எனலாம். அழகு ஒவ்வொருவரின் அன்றாடக் கனவாகவே விடிகிறது. அனைத்தையும் வெல்லும் ஆளுமையும் ஆற்றலும் பெற்றிருக்கும் மனித இனம் தன்னை அழகாகக் கட்டிக்கொள்ளவும், அழகு படுத்திக்கொள்ளவும் தினம் தினம் மெனக்கெடும் செயல்கள் கொஞ்சம் நஞ்சம் இல்லை. 

அதிலும் கொடுமை அடுத்த மாதம் வீட்டு வாடகை கொடுக்க முடியாத நிலையிலும், அடுத்தவேளை உணவிற்கு பணம் இல்லாத நிலையிலும் அலங்கார பொருட்களின் மீது இருக்கும் ஆசையும் தன்னை அழகு படுத்திக்கொள்ள வேண்டும் என்ற மோகமும் பலரை நடுத்தெருவிற்கே கொண்டு வந்து விட்டிருக்கிறது.

சாதாரண மக்கள் மட்டுமில்லை அந்தஸ்தின் உச்சியில் இருக்கும் மனிதர்கள் முதல் அனைவரின் நிலையும் அழகில் அடிமைத்தனம் தான்.

இன்றைய காலத்தில் பெண்களில் அத்தியாவசிய செயல்களில் முதலிடத்தைப் பிடிக்கும் புருவ அலங்காரம் முதல் பேசியல், கலரிங், ப்ளீச், பிடிக்யூர், மணிக்யூர், வாக்ஸிங் போன்றவை வாடிக்கையாகவுள்ளது.

இதனால் வரும் மனரீதியான மற்றும் உடல் ரீதியான தொந்தரவுகளை யோசிப்பதும் இல்லை ஆனால் அழகாக இருக்க வேண்டும் என்ற எண்ணத்தினால் மட்டுமே இதனை செய்வதுண்டு.

இன்னும் வேடிக்கை என்ன வென்றால் பலர் சிகப்பு அழகு பூச்சுகளை குறைந்தது பத்து வருடமேனும் பயன்படுத்தியும் கொஞ்சம் கூட சிகப்பாகவில்லை என்பதை புரிந்து கொள்ள முடியாத அளவு முட்டாளாக மீண்டும் மீண்டும் அவற்றை பயன்படுத்துவது.

ஆக அடிமைத்தனம் மட்டுமல்ல முட்டாள்த்தனமும் இந்த புரியாத அலங்காரங்களால் நம்மை சூழ்கிறது.. இதனை புரிந்து கொள்ள முடிந்தவர்கள் சொற்பமாகவே இந்த மண்ணில் உள்ளனர். ஏதோ பெண்களை மட்டும் குறிவைத்து இவற்றை சொல்கிறேன் என்று நினைக்க வேண்டாம், இவை அத்தனையையும் இன்று ஆண்களும் மேற்கொள்கின்றனர்..

சரி இதெல்லாம் ஒரு பக்கம் இருக்கட்டும், இதனால் என்ன? அழகாக இருப்பதும், அழகாக தங்களை காட்டிக்கொள்வதும் குற்றமா? என்ன என்கிறீர்கள்.. இல்லவே இல்லை அழகு என்பது ஒவ்வொருவரின் தனிப்பட்ட சுகந்திரம், தன்னம்பிக்கை மற்றும் உரிமை..

ஒவ்வொருவரிடமும் தனித்தன்மையுடன் படைப்பில் காணப்படுவதும் அழகுதான்.

ஆனால் தவறான பழக்கங்களினால் ஏற்படும் பாதிப்புகளை பற்றித்தான் கூறுகிறேன். எவ்வாறு ஒரு இயந்திரமோ அல்லது பக்குவமோ சரிஇல்லையென்றால் சாதாரண இட்லி கூட சரியாக வருவதில்லையோ அதே போல் நாம் செய்து கொள்ளும் அல்லது பயன்படுத்தும் அனாவசிய செய்கையால் ஓட்டுமொத்த உடல் ஆரோக்கியமே கெடுகிறது. அழகிற்கும் இயந்திரத்திற்கும் அவ்வளவு சம்மந்தம் இருக்கிறது. 

இந்த அலங்காரங்கள் வெளி அழகை ஆரம்பத்தில் மேம்படுத்துவது போல் இருந்தாலும் நாளடைவில் முகமாக இருந்தாலும் சரி, தோலாக இருந்தாலும் சரி அல்லது தலை முடியாக இருந்தாலும் சரி இவை அனைத்தும் காலப்போக்கில் பார்க்க சகிக்காத அளவு நலிந்து போகிறது. கண்கூடாக இந்த நிலையில் பலரைப் பார்த்திருப்போம்.

அழகு என்பது உள்ளிருந்து வெளியில் வருவது

அழகு என்பது உள்ளிருந்து வெளியில் வருவது. அதாவது நமது உடல் உறுப்புகளின், உடல் நரம்புகளின் ஆரோக்கியமே வெளியில் இருக்கும் முகத்திற்கும், தோலிற்கும் அழகைத் தருவது. உள்ளுறுப்புகள் பலமாகவும், ஆரோக்கியமானதாகவும் இருந்தால் முகமும், தோலும் பளபளப்பாகவும், பளிச்சென்றும் ஒருவித ஈர்ப்பு சக்தியுடன் இருக்கும்.

உள்ளுறுப்புகளில் அல்லது உடலில் ஏதேனும் நச்சுக்கள் அல்லது கழிவுகள் சேர்ந்திருந்தால் அவற்றை உடல் வெளியேற்ற முயற்சிக்கும். அந்த முயற்சிக்கு நமது உணவும், பழக்க வழக்கங்களும் துணை புரியவேண்டும்.

சரியான உணவினையோ அல்லது சீரான பழக்க வழக்கங்களோ இல்லாது இருந்தால் நமது உடல் ஒரு கட்டத்தில் இந்த கழிவு வெளியேற்றத்திற்கு துணை புரியாது.

அவ்வாறு துணை புரிய வில்லை என்றால் உடல் தனக்கு சுலபமான வழியான உடலில் மிருதுவான தோலிலும், முகத்திலும் அவற்றை பிரதிபலிப்பதுடன், உடல் கழிவுகளை வெளியேற்றவும் செய்யும். இந்த வெளியேற்றம் உடல், முகப் பொலிவையும், மிருதுவையும், அழகையும் சீர்குலைக்கும். 

முகம் காட்டும் கண்ணாடி

இதையே அந்தக்காலத்தில், ‘அகத்தின் அழகு முகத்தில் தெரியும்’ என்றனர். அப்படி முகத்தில் வெளிப்படும் மாற்றங்களை எளிதாக தெரிந்துகொள்ள முகம் காட்டும் கண்ணாடி என்ற பகுதியில் பார்க்கலாம்.

நமது எண்ணங்கள் மட்டுமில்லாது உடலில் ஏற்பட்டிருக்கும் சத்து குறைபாடுகள், கழிவுகளின் தேக்கம், நச்சுக்களின் அளவு இவற்றை தோல் மூலம் தெரிந்து கொள்ளலாம்.

அழகு கெடுவது மட்டுமல்ல தோலில் ஏற்படும் பல பல தொந்தரவுகளான கட்டிகள், புண்கள், சிராய்ப்பு, சொறி போன்றவற்றிற்கும் இவையே காரணமாகிறது.

அழகு என்றதும் தோலினை அழகுபடுத்தும் நமக்கு அந்த தோல் தான் சிறந்த கண்ணாடியாக இருக்கிறது என்பது பலமுறை மறந்து விடுகிறது. எந்த பிரத்தியேக நவீன ஸ்கேன்னும் தேவையில்லை நமது உடலின் ஆரோக்கிய நிலையை தெரிந்து கொள்ள என்ற அற்புதமான படைப்பை மறந்து விட முடியுமா.. 

தோலில் ஏற்படும் அனைத்து தொந்தரவுகளுக்கு காரணமானது உடலில் சேரும் அதிகப்படியான நச்சுக்களே என்பதை மறந்து விடமுடியாது.

சேரக்கூடாது உணவுகளாலும், அதிக ரசாயன, பூச்சிகொல்லிகள் கலந்த உணவுகளாலும் ஏற்படும் வேதியல் மாற்றத்தினால் தோல் பாதிப்படைகிறது. அதே போல் அதிக இரசாயனங்கள் கலந்த பூச்சுக்கள், சோப்புகள், இரவு வேலையின் காரணமாக தூக்கமின்மை, உடல் சூடு போன்ற பழக்கங்களாலால் வரும் கழிவுகளாலும் தோலின் நிறமும், மினுமினுப்பும் குறையும்.  

இவற்றை எளிதில் நமது உணவுகளின் மூலமாக சீராக்கிக்கொள்ளலாம். அதுவும் இரசாயனங்கள் சேராத நல்ல காய்கறி, பழங்கள், கீரைகளால் உடல் பொலிவை மெருகூட்டும் என்றாலும், நமது உணவு கலாச்சாரத்தில் 80% அரிசியாக இருப்பதால் சிறந்த பாரம்பரிய அரிசியான தூயமல்லி அரிசியினைக் கொண்டு மேலும் மெருகூட்டலாம்.

நமது உணவில் காலை பலகாரம், பகல் உணவு, இரவு உணவு என அனைத்திலும் ஏதோ ஒரு வகையில் அரிசியின் சாயல் வந்துவிட சுலபமாக பாரம்பரிய அரிசியினைக் கொண்டு அழகாகலாம்.

அழகூட்டும் அரிசி – தூயமல்லி அரிசி

தூயமல்லி அரிசி என்றதுமே அரிசியின் நிறமும் அதன் குணமும் தெரிந்திருக்கலாம். தூய்மையான வெளிர்  நிறைத்தைக் கொண்ட இந்த அரிசி மல்லிகைப் பூவைப்போல் இருப்பதுடன், உடல் கழிவுகளை வெளியேற்றவும், மேனி பளபளப்பையும் கூட்ட உதவுகிறது.  

தூயமல்லி அரிசியின் சத்துக்கள்

உடலின், இரத்தத்தில், உறுப்புகளில் அடைந்திருக்கும் கழிவுகளை வெளியேற்ற உதவும் இந்த பாரம்பரிய அரிசியான தூயமல்லி பல தாது உப்புக்களையும், வைட்டமின் சத்துக்களையும் கொண்டுள்ளது.

உமியை மட்டும் நீக்கி தவிடு நீக்காத இந்த அரிசியில் மேலும் பல பல சத்துக்கள் அடங்கியுள்ளது. அன்றாட சமையலுக்கு அனைவரும் எளிதாக மாற்றிக்கொள்ள உதவும் இந்த தூயமல்லி அரிசி சிறந்த சுவையினைக் கொண்டது. 

நமது உடலென்னும் இயந்திரம் சீராகவும், சிறப்பாகவும் வேலைசெய்ய அதற்கு நல்ல பராமரிப்பு தேவை. அவ்வாறு பராமரிக்க சிறந்த உணவினையும், உடலுக்கு புரியும் உணவும் தேவை. அவற்றை இந்த பாரம்பரிய அரிசியினை கொண்டு சிறப்பாக அளிக்கலாம். 

என்ன செய்யலாம் இந்த தூயமல்லி அரிசியில்

எல்லா வகை குழம்பு, கூட்டு, ரசம், மோர் என சிறப்பாக இந்த தூயமல்லி வெள்ளை அரிசி சாதத்துடன் உட்கொள்ள சுவையாக இருக்கும்.

இவைமட்டுமல்ல புலாவ், பிரியாணி, தக்காளி சாதம் போன்ற சாத வகைகளுக்கும் இந்த தூயமல்லி அரிசி ஏற்றது.

சிறுகுழந்தைகளுக்கு ஏற்படும் பல வகையான புதுப் புது வியாதிகளுக்கும், பெரியவர்களுக்கு ஏற்படும் சக்கரை வியாதி, இரத்த கொதிப்பிற்கும் நல்ல மருந்தாக இந்த அரிசி இருக்கும்.

தூயமல்லி, தூய உடலை மட்டுமல்ல தூய மனதையும், தூய எண்ணத்தையும் உடலுக்கு கொடுக்க தேஜஸான பொலிவை அனைவரின் மத்தியிலும் வெளிப்படுத்தும் சிறந்த அரிசி.

5/5 - (2 votes)
சிந்தனை துளிகள் :

கற்கையில் கசப்பு கற்ற பின் இனிப்பு.

You may also like...

2 Responses

  1. சக்திவேலு says:

    அருமை

Leave a Reply

Your email address will not be published.

error: Content is protected !!